Хабарландыру бойынша алаяқтар

Бірыңғай жинақтаушы зейнетақы қоры (бұдан әрі – БЖЗҚ, Қор) соңғы кездері интернет арқылы жасалатын алаяқтық әрекеттердің көбейіп кетуіне байланысты қазақстандықтарды қырағы болуға шақырады.
Ал интернет арқылы әрекет жасайтын алаяқтар бүгінде аңғал азаматтарды алдаудың жаңа әдістерін ойлап тауып жатыр. Солардың бірі – несие рәсімдеуге қатысты болып отыр. Мұнда алаяқ әр түрлі бүркеніш атты жамылып, интернетте хабарландыру орналастырады. Онда ол Астана және басқа да қалалардың тұрғындарына екінші деңгейдегі банктерде несие рәсімдеуге көмектесетіндігі туралы уәде береді. Хабарландыруға қызығушылық білдірген адамға алаяқтың банктік картасының деректемелері көрсетілген SMS-хабарлама жіберіледі және клиенттің төлем қабілетін растайтын «дұрыс үзінді-көшірме» алу үшін «белгілі бір сыйақы» аудару талап етіледі. Содан кейін осы SMS-хабарламада көрсетілген «БЖЗҚ» АҚ бөлімшелерінің бірінде Қор қызметкері «дұрыс үзінді-көшірмені» береді-мыс.
Қазақстан азаматтарының зейнетақы жинақтары туралы анықтаманы Қордың кез келген бөлімшесіне келу арқылы, сонымен қатар электрондық пошта, Қор сайты, «БЖЗҚ» АҚ ұялы қосымшасы және egov.kz электрондық үкіметі бойынша тегін алатындықтарын тағы да ескертеміз.
Қазіргі уақытта БЖЗҚ орын алған деректерге қатысты мәліметтерді процессуалдық шешім қабылдау үшін құқық қорғау органдарына жолдады.